Kingdom of Cambodia - కింగ్‌డమ్ ఆఫ్ కాంబోడియా

Kingdom of Cambodia - కింగ్‌డమ్ ఆఫ్ కాంబోడియా

 ప్రపంచ వీక్షణం

చరిత్ర పుటలలో... కాంబోడియాను కింగ్‌డమ్ ఆఫ్ కాంబోడియా అని పిలుస్తారు. పూర్వం దీనిని కాంపూచియా లేదా కాంభోజ దేశం అని పిలిచేవారు. క్రీస్తుపూర్వం 6000 సంవత్సరాల క్రితం నుండే దీని ఉనికి చరిత్రలో ఉంది. క్రీస్తుశకం 700 నుండి ఖ్మేర్ రాజులు కాంబోడియాను పరిపాలించారు.

ఈ రాజవంశమే దాదాపు 13వ శతాబ్దం వరకు అధికారం చలాయించింది. 14వ శతాబ్దం నుండి కాంబోడియా పతన దిశలో నడిచింది. 18వ శతాబ్దంలో ఫ్రెంచి రాజులు కాంబోడియాను ఆక్రమించుకున్నారు. అనేక పోరాటాల తర్వాత 1953లో ఫ్రాన్స్ నుండి కాంబోడియాకు విముక్తి లభించి స్వతంత్రదేశంగా అవతరించింది.

అంకోర్‌వాట్: ఇక్కడ ఆర్కియాలజీ పార్కు చూడదగ్గది. ఇక్కడ బ్రహ్మాండమైన బౌద్ధ దేవాలయం ఉంది. బౌద్ధ భిక్షువుల సమూహాలు ఇక్కడ ఎక్కువగా దర్శనమిస్తాయి. దీనిని తప్పనిసరిగా చూడవలసిందే. ఇది సీమ్‌రీప్ నగరంలో ఉంది. ఇక్కడే అంతర్జాతీయ విమానాశ్రయం ఉంది.

ఆహారం
కాంబోడియాలో వరిధాన్యం ఎక్కువగా పండుతుంది. అన్నంలో సూపులు, నూడుల్స్, చేపలకూర, చేపల పులుసు, చేపల సూపు, పాలు, చింతపండు, అల్లం మొదలైన వాటితో ఆహార పదార్థాలు తయారుచేస్తారు. ఖ్మేర్ ప్రాంతంలో తినే వంటకాలను ‘ప్రహోక్’ అంటారు. ఇందులో చేపలతో చేసిన పేస్టు ప్రత్యేకంగా ఉంటుంది. వీరికి ఇష్టమైన పానీయం ‘అమోక్’. వీరు కొబ్బరిపాలను మనం కాఫీ తాగినట్లుగా తాగుతూ ఉంటారు.

పంటలు-పరిశ్రమలు
దేశంలో వరి, మొక్కజొన్న, అరటి, రబ్బరు, పొగాకు, జనుము, కలప ఎక్కువగా పండుతాయి. సముద్ర తీరంలో చేపలు, అడవులలో కలప బాగా లభిస్తాయి. దేశంలో వ్యవసాయ ఆధారిత పరిశ్రమలు బాగా ఉన్నాయి. చేపలను విదేశాలకు ఎగుమతి చేయడం, కలప వ్యాపారం  వీరి ముఖ్యమైన వ్యాపారాలు. ఇవేకాదు, వివిధ రకాల కూరగాయలను, ముడి రబ్బరును కూడా విదేశాలకు ఎగుమతి చేస్తూ ఉంటారు.

విహారస్థలాలు
ప్రేక్ ఆంపిల్: ఇది కాంపోట్ జిల్లాలో కోటోచ్ ప్రాంతంలో ఉంది. ఇక్కడి తెల్లటి ఇసుక సముద్రతీరంలో కనిపిస్తుంది. వేలాదిగా మాంగ్రూవ్ చెట్లు తీరమంతా నిండి ఉంటాయి.

నగరాలు - పట్టణాలు
కాంబోడియా దేశాన్ని పరిపాలనా సౌలభ్యం కోసం 25 ప్రాంతాలుగా విభజించారు. అలాగే దేశంలో 159 జిల్లాలు, 26 పురపాలక నగరాలు ఉన్నాయి. ముఖ్యమైన నగరాలలో సిసోప్రాన్, బట్టమ్‌బాంగ్, కాంపాంగ్‌బామ్, కాంపాంగ్ స్పే, కాంపాంగ్ ధామ్, కాంపోట్, టాఖ్మో, క్రాంగ్ ఖెప్, క్రాచే, సెన్మనోరమ్, సమ్‌రోంగ్, నామ్‌ఫెన్, సిహనౌక్ బెంగ్ మీంచే, పుర్సట్, ప్రేవెంగ్, బాన్‌లుంగ్, సీమ్‌రీప్, స్టంట్‌ట్రెంగ్, స్వేరీంగ్, టేకియో, సువాంగ్ ఉన్నాయి.
 
బోటమ్ సకోర్ జాతీయ పార్కు
ప్రసత్‌బేయన్‌లో బోధిసత్వుడు, అవలోకిటేశ్వరుల భారీ విగ్రహాలను దర్శించవచ్చు. అలాగే బోటమ్ సకోర్ జాతీయ పార్కు, ఇలా ఎన్నో ప్రాంతాలు చూడదగ్గవి  ఉన్నాయి.

అత్యంత పురాతనదేవాలయాలు
వేలాది సంవత్సరాల పూర్వం అప్పటి రాజులు నిర్మించిన దేవాలయాలను ఇప్పటికీ మనం చూడవచ్చు. అలాంటి వాటిలో నామ్‌ఫెన్ నగరంలో ఉన్న దేవాలయాలు, టా ఫ్రోమ్, ఇంద్రదేవాలయం... ఇలా మరెన్నో ఆలయాలు మనకు దర్శనమిస్తాయి.

చా ఓంగ్ జలపాతం
ఇది బాన్‌లాంగ్ పట్టణానికి రెండు కిలోమీటర్ల దూరంలో ఉంది. ఇక్కడ నీళ్ళు పైనుండి మూడు అంతస్థులుగా క్రిందికి జాలువారడం ఒక ప్రత్యేకత. ఈ జలపాతం నిరంతరం ప్రవహిస్తూనే ఉంటుంది. ‘ఏసేపక్‌టామక్’ అనే పర్వతం నుండి ఈ జలపాతంలోకి నీళ్ళు వస్తూ ఉంటాయి.

సంస్కృతి - సంప్రదాయాలు
కాంబోడియాలో బౌద్ధమత ప్రాచుర్యం అధికంగా ఉండడం వల్ల ఎక్కడ చూసినా బౌద్ధ సన్యాసులు దర్శనమిస్తూ ఉంటారు. గ్రామీణ ప్రాంతాలలో నివసించేవారు క్రామా అనే దుస్తులను ధరిస్తారు. భారతీయ సంస్కృతిని ప్రతిబింబించే రీతిలో ‘సామ్‌పోట్’ అనే ఒకరకమైన దుస్తులను కూడా వీరు అధికంగా ధరిస్తారు. ఎందుకంటే కాంబోడియాలో ఒకప్పుడు హిందూమతం గొప్ప ప్రాచుర్యంలో ఉండేది.

టాగ్లు: కాంబోడియా, కింగ్‌డమ్ ఆఫ్ కాంబోడియా, ఖ్మేర్ రాజు, ఆర్కియాలజీ పార్కు, Cambodia, Kingdom of Cambodia, Khmer Raju, archaeology park

Special Cuisines in different Countries

Special Cuisines in different Countries
ప్రయాణపు పసందు..

పొరుగూరుకు వెళ్లాలంటేనే అక్కడ ఆహారం ఎలా ఉంటుందో అని సందేహ పడతాం. అలాంటిది విదేశాలకు ప్రయాణం అంటే..!!
ఎయిర్‌పోర్ట్ దగ్గర నుంచే ఆహారపదార్థాల ఎంపిక పట్ల రకరకాల సమస్యలు ఎదురవుతుంటాయి. వెళ్లబోయే
 ప్రదేశాలలో ఎలాంటి పదార్థాలు లభిస్తాయి.. ఎలాంటివి
 నిరభ్యంతరంగా తీసుకోవచ్చు..
 అని సందేహ పడుతుంటారు. వంటకాల పట్ల కొంత అవగాహన పెంచుకుంటే ఆహారం విషయంలో ఇబ్బంది పడాల్సిన అవసరం ఉండదు. మన దేశీయులు తరచూ సందర్శించే దేశాలలో థాయ్‌లాండ్, మలేసియా, చైనా, జపాన్, మెక్సికో, ఇటలీలు.. ప్రధానంగా ఉంటుంటాయి. ప్రపంచ ప్రసిద్ధి చెందిన దేశాల వంటకాల జాబితాలో మన దేశంతో పాటు పైన చెప్పిన దేశాల రుచులకూ స్థానం ఉంది. మనకు పరిచయం ఉండే దేశాల వంటకాల గురించిన సమాచారం ఇదీ...
 
కారం కారంగా... థాయ్‌లాండ్ (THAILAND)..!

థాయ్ వంటకాలలో ప్రధానంగా వెల్లుల్లి, కారం, మిరియాలు... ఉంటాయి. మన వంటకాలతో పోలిక ఉన్న మరొక పదార్థం నిమ్మరసం. ఆ తర్వాత కొత్తిమీర. ఇంచుమించు అన్ని సంప్రదాయ వంటలలోనూ వీటిని ఉపయోగిస్తుంటారు. ఇక ఫిష్ సాస్, ఉప్పు కలిపిన రొయ్యల ముద్ద మాంసాహారప్రియులను అలరిస్తుంది. ఇక్కడి వీధుల్లో చిన్న చిన్న స్టాల్స్‌లోనూ ‘పడి థాయ్’ అనే వంటకం నోరూరిస్తుంటుంది. ఇది థాయ్ జాతీయ వంటకం. దీనిని నూడుల్స్, సోయా టోఫూ, చింతపండు గుజ్జు, నిమ్మరసం కలిపి తయారుచేస్తారు. శాకాహారం, మాంసాహారంలోనూ ఈ వంటకం లభిస్తుంది.

ఆలివ్ రుచి.. గ్రీసు (GREECE)..!

ఆలివ్ వంటకాలకు గ్రీసు దేశం ప్రసిద్ధి. ఆలివ్ ఆయిల్ వల్ల ఇక్కడి వంటకాలు అత్యంత రుచిగా, తాజాగా ఉంటాయి. ఎక్కువగా సలాడ్స్ రూపంలో దొరికే ఇక్కడి వంటకాలలో కూరగాయలు, మూలికలు, గింజధాన్యాలు, బ్రెడ్, వైన్, చేపలు... వాడతారు. మరీ ముఖ్యంగా బ్రెడ్, టొమాటో, చీజ్, వంకాయ, మన పెరుగులాంటి యోగర్ట్‌తో.. చేసే వంటకం ఇక్కడ ప్రసిద్ధి. గ్రీసు దేశపు జాతీయ డిజర్ట్‌గా దీనికి పేరుంది. అవసరాన్ని బట్టి వంటలలో నట్స్, తేనె వాడుతుంటారు. బుధ, శుక్రవారాలు శాకాహారానికే ప్రాముఖ్యం ఇస్తారు.

రైస్ నూడుల్స్ హవా.. చైనా (CHINA)..!

రెండు చెక్కపుల్లల సాయంతో భోజనం చేసే నేర్పు చైనీయుల సొంతం. చైనా ‘యిన్ యాన్’ సాంస్కృతిక అంశాలు వీరి పాత్రలలో ఘుమఘుమలాడుతుంటాయి. కూరగాయలు, పండ్లు, మాంసం.. అతి శీతల కౌంటర్లలో కొనుగోలు చేస్తారు. ఇక చైనా నదీ తీరాలలో పండిన ధాన్యపు పంటతో ఫ్రైడ్ రైస్, నూడుల్స్ తయారు చేస్తారు. ఇదే వీరి ప్రధాన ఆహారం. వీటినే వందల రకాల రుచులతో తయారుచేస్తారు.

షాంపైన్ అంటే ఫ్రాన్స్ (FRANCE)..!

ఫ్రెంచ్ ఆహారంలో ‘బాగెట్టై’ అనే బ్రెడ్‌తో పాటు చీజ్, షాంపైన్, నత్తలు... ఎక్కువగా కనిపిస్తాయి. విలాసవంతమైన హోటల్స్‌లో ‘హాటె క్యుజిన్’ అనే డిష్ లభిస్తుంది. అరుదుగా లభించే వైన్, బంగాళదుంప, వెల్లుల్లి, ఆకుకూరలను దీంట్లో వాడతారు. చేపలు, గుడ్లు, బఠానీలను ఇతర వంటకాలలో ఉపయోగిస్తారు. చాక్లెట్స్ తయారీ ఎక్కువ.

మొక్కజొన్న, బీన్స్ వంటకాల మెక్సికో (MEXICO)..!

మెక్సికన్ ఆహార తయారీ పద్ధతులలో స్పానిష్ ప్రభావం అధికం. ఫ్రెంచ్, ఆఫ్రికన్ చారిత్రక అంశాలు వీరి వంటకాలలో కనిపిస్తాయి. మొక్కజొన్న, చిక్కుడుగింజల(బీన్స్) తరహా వంటకాలు ఇక్కడ ప్రముఖంగా కనిపిస్తాయి.

వేడి వేడి పిజ్జాల... ఇటలీ (ITALY)..!

ఇటలీ వంటకాలు ప్రపంచమంతా కోరుకునే విధంగా ఉంటాయి. ఈ దేశ పాకశాస్త్ర నైపుణ్యం అలాంటిది. సన్నని పలక మాదిరిగా ఉండే పిజ్జా, పాస్తాలో వందలరకాలు కనిపిస్తాయి. ఇవన్నీ అన్ని దేశాలలోనూ లభిస్తున్నాయి.

తేనీటి విందుకు... జపాన్ (JAPAN)..!

నాలుకను వెర్రెత్తించే జపనీస్ వంటకం నోటినిండా రుచిని పంచుతుంది. ఇక్కడ రెస్టారెంట్‌లలో ‘యాకిటోరి (గ్రిల్డ్ చికెన్), ‘సుషి, సాషిమి (చేపలు), టెంపురా (వేయించిన దినుసులు), నూడుల్ బార్స్.. నోరూరిస్తుంటాయి. వీరి విందులలో తేనీరు ప్రధానమైనది. గ్రీన్ టీ, తేయాకుతో తయారుచేసే కేకులను టేస్ట్ చేయాల్సిందే! ఇక పదార్థాల కలయిక, తయారీ, విందులో కొద్ది కొద్ది మోతాదులో వడ్డించే తీరులో వీరి సంప్రదాయ కళ చూడముచ్చటగా ఉంటుంది.

రైస్ భేష్... ఇండోనేషియా (INDONESIA), మలేషియా (MALAYSIA)!

ఈ రెండు దేశాలు వంటకాలకు ప్రపంచానికి అతి పెద్ద వేదిక. చైనా, పోర్చుగీస్, ఇండియాలకు.. పాకశాస్త్ర నిపుణులు, కలినరీ కాన్సెప్ట్‌లో వివిధ రకాల దినుసులను, పదార్థాలను కలపడం ఈ దేశస్థులే తీసుకువచ్చారు. ఈ రెండు దేశాలను ఆహారానికి మారుపేరుగా చెప్పుకుంటారు. ఇక్కడ ధాన్యం సమృద్ధిగా లభిస్తుంది. మిర్చి పంటలు ఎక్కువ. మన రుచికి ఇక్కడి వంటకాలు ఏ మాత్రం తేడా అనిపించవు.

కుంకుమపువ్వుకు స్పెయిన్ (SPAIN)

ఏ దేశానికి వెళ్లినా ఆహారం గురించి ఇబ్బంది తలెత్తవచ్చు. స్పెయిన్‌కి వెళితే మాత్రం ఏ ఇబ్బందీ ఉండదు. మన బిర్యానీని పోలిన ఆహారమే ఇక్కడా లభిస్తుంది. మాంసాహారం, శాకాహారంతోనూ తయారుచేసే ఈ వంటకం పేరు ‘పయెల్లా.’ ఇది స్పెయిన్ జాతీయ వంటకం కూడా! ప్రాంతీయ  వంటకాలలో ప్రధానంగా కుంకుమపువ్వు, జీలకర్ర, తేనెను ఉపయోగిస్తారు. సీ ఫుడ్ (సముద్ర జీవులతో తయారుచేసే ఆహారం), మాంసాహార తయారీలో సాస్‌లను కలుపుతారు. వీరికి రాత్రి భోజనం ప్రధానమైనది. రాత్రి 9 తర్వాతే వీరు ‘నైట్ మీల్ ఈవెంట్’ను జరుపుకుంటారు. వేడి వేడి సూప్‌లలో ‘క్యాట్ సూప్, డాగ్ స్టెవ్’లు లభిస్తాయి.

TAGS (టాగ్లు) : ఆహారం, థాయ్‌లాండ్, మలేసియా, చైనా, జపాన్, మెక్సికో, ఇటలీ, వంటకాల, Food, Thailand, Malaysia, China, Japan, Mexico, Italy, the dishes